Viaxando no tempo: o Renacemento!

"Home de Vitrubio", debuxo de Leonardo da Vinci

 No século XV e XVI, despois da escura Idade Media e antes do mundo moderno, aconteceron unha serie de transformacións artísicas, culturais, científicas e sociais que coñecemos como o Renacemento. 

 

"David" de Michelangelo

     Domina o Humanismo, a corrente filosófica pola que o ser humano (e non Deus, como na Idade Media) é a medida de tódalas cousas, o centro do Universo (mirade o "Home de Vitrubio" de Leonardo da Vinci").             

  Admírase a antigüidade grecorromana, especialmente o seu arte, emprégase a razón como fonte de coñecemento e búscase a verdade a través da reflexión persoal e da investigación. 

 

Retrato de da Vinci de Lisa Gherardini
 del Giocondo, ou Mona Lisa

E como era a danza en aquel entón?

     O alumnado de 3ºESO vai a empezar a aprender o baile 

"Rostiboli Giogioso", 

unha danza de salón ou cortesá, con tres partes ben diferenciadas: 

 

    -a Bassadanza, 

    -a Piva 

    -e o Quadernario. 

     No Renacemento a sociedade refinada (a nobreza, alta burguesía, etc) adoptou a danza como un dos seus entretementos preferidos. Un bo cortesán debía ter unha boa educación musical, e iso incluía a danza.

           A música de baile tiña que estar composta para bailar, o que condicionou a súa estrutura (para que fose fácil de seguir cos movementos) Isto fai que teña unhas características determinadas:

1. Regularidade das frases musicais, curtas e simétricas.
2. Cadencias claras
3. Ritmos marcados
4. Repeticións habituais.     

  
      Ademais, as danzas adoitaban agruparse en "pares de danza", é dicir, unha parella de bailes contrastantes, cunha primeira danza de pasos en ritmo binario e tempo lento, seguida de unha segunda danza de xiros ou saltos, máis rápida e en ritmo ternario (por exemplo a combinación de Pavana e Gallarda)

    É a partir do século XV cando aparecen os primeiros mestres de danza que establecen regras e pasos precisos, publicando manuais coa coreografía e a música das danzas de moda.

    Pero só existía a danza nas cortes e pazos...?

   

    Non, tamén o pobo bailaba, claro! 

     É nesta época cando empeza a separación entre a danza popular ou folclórica (bailada pola xente común) e a danza cortesá ou de salón (bailada pola aristocracia). De feito, a orixe da danza cortesá está nas danzas populares, xa que estas se transformaron en danzas sociais empregadas como entretemento pola nobreza.

•  Escoita e visualiza agora o baile Rostiboli Giogioso no seguinte vídeo. Cumpre as características xerais da danza renacentista? Esta é a danza que interpretaredes pero bailada polo alumnado do CPI da Gudiña.